太歲壓祭主

是日辛丑牛年大年初一，先祝大家龍馬精神，萬事勝意！

今年唔再講牛年其實上星期已經到左呢d廢話，今次想講下通勝。

講起通勝令我諗起太嫲，細個佢會俾本通勝我玩，當時既通勝仲係中空線裝書，當時當然唔識睇，但自此結下不解之緣。

習慣一到年尾都會買本來年通勝，然後用手機影低，方便使用。翻開通勝，首先映入眼簾的是春牛圖，如果你唔係農夫，呢版可以飛。翻去後頁會見到一個類似八卦既圖，呢個就係流年方位八卦圖，標示各方位之吉凶，此頁非常重要，亦是全本通勝最值錢既部分！

話明係方位八卦圖，就係將八卦「乾坤坎離艮兌震巽」飛佈於「東南西北、東南東北西南西北」八個方位之上。然後太歲值神等神煞飛佈八方，各神煞將對所屬之宮位帶來不同之影響。

如辛丑年值位太歲居丑位，對宮歲破居未位，所謂太歲頭上勿動土，意指此兩宮所屬之東北及西南方皆不宜動土，避免觸怒太歲招來禍端。

另一個凶星五黃飛到巽宮，所謂五黃到處不留情，觸犯五黃將會帶來五件凶事，災病財劫損人丁！因此東南方亦不宜動起土煞。

然後流年三煞在東，所謂三煞其實係災煞坐煞仲有旁邊既劫煞同歲煞，此三煞亦為相當凶險之神煞，坊間有玄學演員話「要快發，鬥三煞」，有種咪即管係呢個方位鬥下三煞，無事既話我知，等小弟學下野！

以上方位都係流年凶神之所在，其實於方位八卦圖左邊已有總結：本年三煞在東，五黃占巽，歲破在未，凡寅甲卯乙辰巽巳未八山忌用，餘各山俱利。

坊間一般對此等凶位有很多不同說法，例如會話家中此等方位不利出行，讀書，事業，財運等等等等。。。要擺相應既風水物品去化解！

諸如此類都係謬誤！此方位八卦圖其實是用於替先人造葬，如是年造葬卦山坐向位於此等方位，而需要於此方位掘土造葬會激起凶神，為後人帶來不吉之事，因此是年皆不宜造葬，要等下一年再擇吉安葬。如是者引申到家居風水當中，不宜於凶方因修葺而招禍。

既然有凶位，自然會有吉位，今日寫住咁多先，有機會先寫下吉位。